Saturday 28 January 2012

Computer Start-Up Hmangchang!



Hmanhmawh em em-in i computer on i tum a, mahse i hmanhmawh zia a hriatpui ve lo che tih hriat ngawih ngawihin i computer chu a lo nung nghal duh mai lova, a in loading chhung i nghak vung vung thin a nih chuan i ning ve thin khawp in ka ring. Chutiang ang dinhmunah chuan i ding ve a, a ngaihna i hre vak si lo a nih chuan hei hi ngun takin lo chhiar ve teh.. I hlawkpui ve ka ring tlat.


  1. Startup thianfai rawh:  Tam tak chuan kan ngaihtuah chian loh vangin thil kan install dawnin kan click pup pup ringawta, chuvang chuan start-up programme (Entirnan: Antivirus ang te hi i computer i on rual khan amahin background ah a lo in start ve nghal zel a, chutiang ho chu start-up programme chu a ni) hi tam tak kan hriat miah lohin kan lo nei leh teuh thin. Chu chuan i computer in load chhung kha a ti rei lo thei lo. I computer nun rual khan khang programme khan nun an rawn tum ve nghal miau a lawm le! A la khawih thang lo tan chuan system in a mamawh leh mawh loh kha kan hre ve tak tak si lova, chuvang chuan kan thianfai duh a nih pawn TuneUp Utilities emaw Advance System Care emaw hmanga start-up programme ho then hi a kawng awlsam tak pakhat chu a ni. I programme kha start-up zingah khan tel turin a pawimawh leh pawimawh loh kha rating a pe nghal; a la thian ngai lo tan chuan zia tak a ni.
  2. I device titawp rawh: Devices kan hman tangkai tur ni lem lo, entirnan Bluetooth transmitters emaw webcams, ang chi te hian i computer kha a in on hun chhung a tih rei avangin i hman dawn lai te lo chuan disabled daih zel kha a tha zawk mah. Taihmak erawh a ngai thung! Hetiang ho hi i hmang ve a, i disable duh a nih chuan Device Manager atang khan i titawp mai thei ang. Windows 7 ah chuan Computer/My Computer i desktop a mi kha right mouse in click la, manage/properties ah kal lehin Device Manager ah khan i lut leh mai dawn nia. XP hmang tan chuan Start menu atanga Settings a luha, Control Panel ah khan Systems icon kha i double click mai dawn nia. Tichuan System Properties window ah khan Hardware tab kha hawngin Device Manager-ah chuan i lut thei ang. Laptop ah phei chuan a in start-up hun chhung a tichak mai nilovin a battery te pawh a daih rei tir bawk tak e!
  3. RAM tilian rawh: RAM memory hi chu computer hian a hna thawhna kawng tin rengah a mamawh zel ti ila a sual tam lo ang. I RAM a len leh tet a zirin i start-up hun chhung kha a reiin a rei lo ve thei tho bawk a nia aw. I theih chuan RAM memory lian zawk vuah la, i inchhir lo hrim hrim ang.
  4. BIOS siam fel rawh: BIOS chu basic input/output system kha a ni mai ti ila kan chiang hlawm ang em aw!? A awlsam zawngin i computer-in software a ken tel sa, Computer i on ruala lo nung hmasa ber kha ti ila a fiah zawk mai thei bawk. BIOS Set-up a lut tur hian i computer leh windows a zirin a danglam thei an ti!! F10 emaw CRTL+ALT+S emaw F1 emaw DEL key hi i computer in startup laia i hmeh chuan BIOS ah i lut ang. BIOS i luh hunah chuan Boot menu ah kal ang che. BIOS screen tam tak ah chuan, quick boot option a lo awm nghal mai anga. Kha kha Enable la, eng eng emaw in test thin ho tham te te kha a test tawh ngai lo ang. Boot Device Priority kha en leh la, first boot device ah khan hard drive dah ang che. Tichuan start-up hun chhung a rei lo sawt ang. Mahse CD-ROM atanga i boot dawnah CD-ROM ah i dah hmasak phawt a ngai thung ang. Heng hi i set zawh vek-ah, save changes and exit kha i click keuh mai dawn nia.
  5. I fonts duh loh paih vek rawh: I computer ah khan a thil chhu mi te tan hawrawp tam tak bilh tel a ni a, khang khan start-up hi a timuang mai ni lovin computer hrim hirm pawh a timuang an ti! Chu mi chu i pumpelh duh a nih chuan hawrawp tangkai lo leh i hman duh miah loh tur ang chi kha word/page maker etc vel hmangin en chiangin chhin chhiah la, i duh loh zawng kha i paih vek mai dawn nia. A luhna tur i hre lo a nih chuan Start atang khan i zawng anga folder hminga fonts ti lo awm kha han lut la, a lo awm dul mai ang..

A chhiartu zingah Start-up hmangchang dang hria kan awm chuan comment hmangin i share tlang teh ang u. Mahse comment tur chuan he blog hi follow hmasak a ngaih ve khanglan kha aw.. :)

1 comment:

  1. Been using Kaspersky protection for many years now, and I recommend this product to all of you.

    ReplyDelete

Blog Follow hmasa lo chuan Comment hi a dah theih loh ang!!