ANDROID BIHCHIANNA

Tuna khawvela mobile operating system lar ber nihna hauh mektu Android OS hi khawvel puma hman tura tlangzarh a nih țan chu December 2009 chauh kha a la ni a. Tun dinhmunah (October 2015) chuan Android 4.4 "KitKat" hi version hmangtu ngah ber ni mekin Android device hmangtu 38.9% zetin he Version ațang hian Google Play an lut țhin mek a ni. "Jelly Bean" versions (4.1–4.3.1) hian a dawttu dinhmun hauh mekin 30.2% velin an hmang mek thung.

Android mobile operating system hrim hrim hi chu November 2007 ațang khan (Android beta) hman țan a ni a. Mahse enchhinna ang chauh a la ni. Android 1.0, kha September 2008 ah zawrh chhuah țan a ni a, mahse khawvel pum a la huap lo. Android hi a neitu Google lamin an țhuam țhat reng bakah Open Sources a nih vangin Open Handset Alliance (OHA) lam pawh an lo țang ve reng a, chuvangin version update hi a awm chho ta thluah reng a ni.

Tun dinhmuna Android update thar ber ni mek chu Android 6.0 "Marshmallow" an tih mai, thla hmasa, October 2015 a an release kha a ni a. Android M ti pawhin an sawi țhin bawk. April 2009 ațang khan Android version an developed thar te hi themedcode neiin, ei tur lam hming puin, alphabetical order in a hming an phuah țhin a. Chutianga hming nei hmasa ber chu Android 1.5 "Cupcake" kha a ni a; hemi hmalama version hmasa, version 1.0 leh version 1.1 te kha chuan hming bik an nei ve hman lo. Version hming nei hrang hrangte chu:
1. Cupcake (1.5)
2. Donut (1.6)
3. Eclair (2.0–2.1)
4. Froyo (2.2–2.2.3) {Frozen Yogart kaih tawi}
5. Gingerbread (2.3–2.3.7)
6. Honeycomb (3.0–3.2.6)
7. Ice Cream Sandwich (4.0–4.0.4)
8. Jelly Bean (4.1–4.3.1)
9. KitKat(4.4–4.4.4, 4.4W–4.4W.2)
10. Lollipop (5.0–5.1.1)
11. Marshmallow (6.0)

Tihian Android chungchang an sawia ICS, JB, Kk/K, L leh M an tih pawhin buai phah duh tawh reng reng suh..

September ni 3, 2013 khan Google lam phei hi chuan android OS hmangtu Billion khat chuang an neih thu an lo puang daih tawh a. June 2015 data ațanga en chuan, khawvel puma SmartPhone hmanga Internet lut (access) țhin zawng zawng zinga 59.1% lai hian Android device an hmang a, China ram bikah phei chuan 68.3% laiin he OS hi hmangin USA lamah pawh 40.78% vel laiin an hmang a ni..

Tin, Codename țhenkhat hi chuan version pakhat aia tam te an huap a, a țhen hi chuan pakhat chauh a huam thung. Android 1.0 leh 1.1 te hian mipui nawlpui hriat hlawh khawpin Codename nei ve lo mahse Android 1.1 bik hi chuan "Petit-Four" ti pawhin hretu a nei nual..

Android OS hmang mobile/device ngawt pawh hi chi hrang hrang 16,000 vel bawr awma rin a la ni cheu bawk nen, android developer ho tan pawh google play (playstore) a application update dah dan turah leh version zawng zawng mil tura siam chu buaithlak ve tak tur chu a ni...

Android device te hi a siamtu company a zir leh OS version a zirin a management leh support chin pawh a in ang lo zeng zung a, chuvangin tips kan sawi tur ho ah pawh mil loh leh dik ve theih miah loh i neih chuan i OS in a mil lo emaw, i device siamtu lamin an phal ve lo emaw a ni thei tih hre tel ta ila..

Guide a step leh i mobile a in mil lo a nih pawn i inzawn chhuah a awlsamna tur chuan a pui tho turah che ka ngai.. Chuvangin guide reng reng, chhiar chiang lovin apply ve puat puat ngawt lo la, chiang takin i chhiar hmasa zel dawn nia..