WhatsApp Hmangchang 2015

Kum tawp a hnai ta bawk a, a la hre lo te pualin WhatsApp Messenger (Android) hmangchang tlem te i han thai leh zuai teh ang..

A. Latest Version: Official latest version hman duh chuan PlayStore ah aiin an official site ah an update chak zawk avangin https://www.whatsapp.com/android ah hian kalin a apk file download mai theih reng a ni a. He page a lut buai lo pawh hian a latest version link https://www.whatsapp.com/android/current/WhatsApp.apk hi bye-heart theih chuan url box ah download duh apiangin type a enter keuh mai chi. A nih loh pawn link hi copy a bookmark keuh maiin a awlsam.

B. RAM Management: WhatsApp hmang țheuh țheuh ni mah ila, a maintain țhat leh țhat loh a zirin RAM kan ei hek tir dan a in ang lo thei viau awm e. A tlangpuiin group chi hrang hrangah kan awm nual zel a. Mizo chu fiamthu duh leh hriat hmasak inchuh hnam tih takah text ngai pawh group hran hranah kan dawng kur duah zel a. Tin, țhenkhat mawl fal deuh, midang mobile tih hang tum tawk an lo awm thul! Heng conversation zingah hian video, mp3 leh image file vel a lo awm tel nawk bawk a. Chuvangin hei hian RAM a ei tam tir hle thei tih hriat a țha. I manage uluk peih chuan miin 800mb dawn dawn RAM an ei tir laiin 200mb velah i khung leng char char thei a nia. A bikin low-budget smartphone ho tan chuan apply keuh a fuh ang. Hetiangin:

1. Mahni chauha i awmna tur group siam la, chu group ah chuan i thu duh ho apiang i forward lut zel ang a. Private/Personal Message (PM) ho chu in inbiak tawpah i delete nghal zel ang a. Group message ho pawh i data i off dawn emaw, i mut dawnah i clear vek zel ang. Hetiangin - Group ah lut la > Menu > Clear Chat > All Messages > Ok.

2. PM i delete hma leh Group Chat i clear hmain file an lo thawn che i download ho reng reng i download zawhah copy chhuakin folder dangah dah hmasa zel ang che. Hetiangin - File Manager hawng la > SD Card or Memory Card hawng la (SD Card i vuah loh chuan inbuilt memory) > WhatsApp folder chhungah lut la > I file download concern folder ațangin i file download kha cut la > Back chhuakin SD Card chhunga i dahțhat duhna folder, WhatsApp folder ni lo, folder dangah paste rawh. Hetianga i maintain nitin peih a nih chuan RAM hmang tam mang lovin WhatsApp i hmang reng thei ang.

C. Cloud Backup: Google Drive i hman tela, backup email i dah tel a nih chuan wifi i hman chang apiang talin cloud backup ti țhin ang che. Tichuan i mobile pawh bovin mobile thar hmang leh pawh ni la, i mail kha i access theih chhung chu Drive a i cloud backup hnuhnun ber kha i restore leh thei ang a, i thu dahțhatte i nei kir leh thei ang. Mobile tibo lo pawhin memory card tih chhiat palh theih a ni si a.

D. Sharing Tips: Mi țhenkhat, a bikin zai mi zingah video/mp3 ngai mi hrang hrang hnena whatsapp a thawn țhin kan awm fo a. Data Pack hmanga thawn kan nih phei chuan kan data a kal phah țeuh țhin. Chu ai chuan file sharing service/site hman țangkai a hlawk thlak fu mai. Kan economy in a afford over te a nih chuan thuhran.. Entirnan: I file thehdarh duh chu file sharing site/service (Google Drive, DropBox, Box, ZippyShare, Mediafire, Youtube etc) khawi emaw berah i upload ang a, chu file link chu copy in i thawn duh apiang hnenah khan a link kha i thawn mai ang a. Tikhan vawi khat upload na tur data chiah sengin mi nuaih chuang pawh i thawn thei dawn tihna a ni a. I thawndarh tam pauh leh data i save hnem tihna a nih ber chu.. Mimal tin hnena a file i thawn lai kha chuan mimal tin thawn tura i upload nan khan data a kal vek sia.. Chubakah hetiang method hian WhatsApp a file thawn theih loh file format tam tak i thawn thei a ni tih hre tel ta bawk la..

Smartphone i hman kha smart taka hman tum la, midang tibuai leh ti ralkhel zawng ni lovin, a dik ngei a ni tih i fiah loh phei chu thehdarhtuah țan loh hram lo tum nang che!

SMART hi, i tlin a ni! ✌😇