Saturday, 19 March 2016

Computer tel lova Android mobile root dan leh root hnua tih ngei ngei tur te!

Mobile root chungchang hi a țhatna leh țhat lohna te, engnge root chu a nih chiah tih te hi blog post hmasa lama 'Rooting hi!' tih ah khan ka sawi nual tawh tho avangin ka sawi nawn tawh lo mai ang. Kha post kha chhiar hnua root la tum tho emaw, root lo tum sa hrim hrim a kawng hmang la hre lo te emaw leh root user tana app țha hman theih beitham te te chiah buaipuia a advantage țangkai ber ber hman tum leh si lo kan awm nawk țhin avangin chung ho tan liau liau chuan kaihhruaina Mizo țawng ngeia kan neih ve hi țhaa ka hriat vang chauha he post hi siam ka ni a. Mi tumah root tura ka thlem loh che u ang bawkin in tih sual palh leh tih dik theih lohah mawh ka phur lo tih hi hre hmasa ta ila a țha awm e..

Kan sawi tel tur te hi a mal mal pawhin belhchian tham fe a nih vangin sawi tur a tam nasa mai si a, a lo inzirchian chu mahni hnaah kan dah ang a, mobile khawih danglam thei tura a set danglam dan bik chiah zel kan hrut zar zar dawn a ni tih hre tel ta bawk ila a țha awm e..

DEBUGGING MODE
Hei hi root tur tan leh root tawh tan chuan ON tur a ni a. Chuvangin hei hi kan step hmasa ber tur a ni. Mahse OS hran hranah a ON/Enable dan a hran ve thliah a, i OS a zirin a hnuaia mi hi lo enin i ON thiam mai a rinawm.
1. Android 2.0-2.3.x:
Settings > Applications > Development > USB Debugging.

2. Android 3.0- 4.1.x:
Settings > Developer Options > USB Debugging.

3. Android 4.2.x and higher:
Heng ho ah hi chuan Developer Option hi a in thuhruk avangin haichhuah chawp hmasak a ngai a. System Menu > Settings > About Phone/Tablet > About Phone or Build Number kha vawi 7 i tap (hmet) keuh keuh ang a. Tichuan Developer's Option a lo in tarlang tawh ang.. Chuti a nih chuan a hnuai ami ang hian i ON thei tawh ang.

Settings>Developer Options>USB Debugging. Tap the USB Debugging checkbox.

4. Android 5.0 Lollipop and higher:
Hei pawh a hma ami ang bawk option haichhuah hmasak ngai leh tho a ni, hetiangin -
a) Settings > About Phone > Build number > Vawi 7 tap (hmeh) keuh keuh tur
b) Settings > Developer Options > USB Debugging.

A nihna takah chuan debugging mode hi android developer te tan bika hman tura ruahman a ni a. Chuvangin ON reng hi a nihna takah chuan a him chiah lo, Computer a USB a connect in app a lo install theih bakah mobile a user data a lak chhuah theih niin an sawi a. Chuvang chuan mamawh hunah chiah ON turin developer te hi chuan thurawn min pe hlawm a. Mahse, ka tih ve duh tlat thung erawh, root hnuah mobile buai nung thei tawh lo ang chi repair ngaih chang hian lo ON sa loh chuan ON leh ngaihna a awm tawh țhin loh avangin a harsa zo vek țhin a. Chuvangin ON sa reng mai hi ka la duhzawk fan.. Kei chu Computer nen hian ka thlunzawm khat bawk a, ka thlunzawm lahin midang nilovin keimah hlirin ka thlunzawm bawk a, ka ON sa reng mai a ni.. I thu thu ah hei chu dah phawt ang..

COMPUTER TEL LOVA ROOT DAN
Techology țhang zelah computer tel lova root theihna tur application hi ni telin a pung ve zel a, sawi sen vek chi a ni lovang. Chuvangin a lar leh hman hlawh zual nia ka hriat app 4 bik chiah kan thlur bing ang..

1. Framaroot Method: Framaroot hi mobile root na tura app kan hmelhriat hmasak ber pawl a ni a. Mahse vawiin thlengin mobile root theih loh erawh a la ngah viau. Chutih rualin app dang zawngin an root theih loh root theih khut erawh a nei nual lawi. Hemi hmanga i root dawn chuan:
a) Supported List 👈 hi click in i mobile in a support leh support loh, eng version leh eng exploit nge hman tur tih en phawt rawh.
b) Framaroot hi download rawh. (A version a zirin exploit pathum a eng emaw ber țheuh a awm dawna, i exploit mil kha khawi version in nge nei tih i hriat hmasak a ngai tihna a nih chu i download dawnah)
c) I download zawhah install in open rawh.
d) SuperSu nge SuperUser i install duhzawk thlang rawh (hei hi root access point/administrator/guard tur a ni a, root luhchilh turin SuperUser or SuperSu hmang hian phalna kan in pe zel thei dawn tihna a nih chu)
e) I exploit hman tur ber (Gandalf, Boromir, Faramir, Barahir, Pippin, Gollum, Legolas, Aragorn, etc) kha click rawh.
f) "Your device seems not vulnerable to exploit included in Framaroot" tih emaw "Failed... Exploit work but installation of Superuser and su binary have failed" tih emaw a lo pop chuan a dik lo tihna a ni a, exploirt danga i try vek pawha a dik theih chuan loh chuan uninstall leh nghal mai chi..
g) "Success... Superuser and su binary installed. You have to reboot your device" tih a lo pop chuan a dik a nih hmel. Yes click in reboot la, i mobile nun leh hunah app drawer ah kal la, SuperSu/SuperUser lo awm kha hawng la, binary update ngai lo inti kha normal mode in update ang che. Tichuan a fel der a ni mai..

2. Kingroot Method: Hei hi a awlsamin support a ngah chakin hman a awlsam hle a, hemi hmang i root duh chuan:
a) Kingroot hi download la.
b) I download zawhah install in open rawh. (Data off suh ang che).
c) I tih felah Try it tih kha click la, 100% a in load hma nghah tawp a ni mai. Net a muan chuan a failed phah thei a ni tih erawh hre tel la. Net muan vang a nih chuan a chak hunah tih țhat leh mai tur.
d) 100% hnuah reboot ngai a tih leh reboot la a fel der..
NB: Hemi hmanga root hian OS tam zawkah SuperSu in a replace theih loh bakah custom recovery flash theih chuan lohna device erawh a awm nual a ang.

3. iRoot Method: Hei pawh hman awlsam tak, data on ngai tho a ni. I hmang duh a nih chuan
a) iRoot hi click la download rawh.
b) Kingroot ang deuh khi a ni mai a step awlsam dan chu.
NB: Kei chuan hei hia ka fak deuh ber

4. KingoApp Method: Hei pawh a hma a mite pahnih ang tho. I hmang duh a nih chuan:
a) Kingo hi download la
b) Kingroot step ang tho khi a ni mai.

CUSTOM RECOVERY
Hei hi Root advantage ah chuan kei chuan ka ngaihhlut ber a ni a, mahse root ve si a Custom Recovery flash nachang hre lo erawh kan tam nangiang niin a lang. Root Permission Manager atana kan hman SuperSu/SuperUser/KingUser etc a khawi emaw bera binary update fel ve leh a buaipui fel nghal chi a ni..

Custom Recovery ah hian CWM leh TWRP a awm a, TWRP hi changtlung zawk mahse supported device nei tlem zawk a ni. Mahse i mobile mil official TWRP Recovery a awm loh pawn beidawng nghal ngawt suh.. XDA Developer ho hian un-supported device tana hman theih tura an MOD fo avangin MODDED recovery i device mil a awm chuan i hmang thei tho a nia. Chutiang chiahin CWM Recovery pawh. Custom Recovery hi i flash ve duh a nih chuan: (mahse custom recovery nazawng hi a rintlak loh avangin comment leh rating ațangin a dik ngei em tih fiah hmasa ang che, a dik lo i flash chuan i mobile a buai or thi hmuk thei a nia! Tin, i device in a hnuai ami hi a support ve lo thei a, recovery file i lakna site kha a rinawma, Custom Recovery flash dan step an pek nen hei hi a in an loh chuan kha kha i rin zawk tur tihna a ni. I risk vanga i tihbuaiin mawh ka phur lo a nia. A thiam pan mai a him..)

1. TWRP Recovery Official hi click in i device mil a awm em en phawt la, i device mil a awm loh chuan 'TWRP Recovery image for MB MM XDA' (MB = Mobile siamtu Company, MM = Mobile Model) tiin google leh la, i mobile mil tur i hmuh chuan download phawt rawh. I milpui i hmu zo hlawl lo a nih chuan Step 2 ah i kai chauh ang.

2. CWM Recovery Official hi click in i mobile model mil a awm leh awm loh en la, a awm a nih chuan ROM hnunga number kha click in a image file i download thei ang. A mil tur a awm loh chuan 'CWM Recovery image for MB MM XDA' (MB = Mobile siamtu Company, MM = Mobile Model) tiin google leh la, i mobile mil tur i hmuh chuan download phawt rawh.

NB: TWRP leh CWM ah hian i milpui tur pakhat mah khawvelah i hmu zo lo a nih chuan a milpui tur an la siam ve lo pawh a ni thei a, chuvangin an siam hun i la nghah hret a ngai ang.. I siam thiam ve te a nih ngawt loh chuan..

3. Custom Recovery image i neih hunah Mobileuncle Tools hi click in download la install ang che.

4. I recovery image download kha recovery.img tiin rename la SD/Memory Card ah dah ang che (Folder chhungah ni lovin).

5. Mobileuncle Tools i install kha hawng la, Recovery Update kha click la, i SD/Memory Card leh online a recovery image file a scan ang a, i memory card a recovery kha a detect hunah select la, a lo prompt apianga lo ok a recovery mode a reboot tura a lo suggest leh reboot kha a ni tawh mai.

A bak chu mahni inzir chawpah kan dah tawh ang. Mahse i khawih danglam hmain i memory card ah khan 3GB vel tal a la free a nih chuan i recovery mode a i luh lai khan i system, app & data engkim kha select vekin backup nghal ang che. Tichuan a hnu lamah i khawih buai palh a nih pawhin Recovery Mode ah lutin (Power Button + Volume Up hmeh kawp vang vangin a luh theih tlangpui) a buai hma a i backup kha i install țha leh mai dawn nia.. I backup kha i memory card a dah reng kher kha a ngai chuang lo. Space i ui a nih chuan a folder tawp khan i computer ah copy lutin dahțha la, memory card ami chu i delete daih mai dawn nia. A buai leh palh ta hlauh a nih pawhin card redear hmangin i memory card ah i dah lut leh thei tho si a..

Tikhan i duh tawkin i mobile i ching let ngam tawh a, mobile repairing i pan țhin nachhan tam zawk i pumpelh theih tawh mai bakah i duh chuan Custom ROM, i mobile hman lai aia țha leh changtlung zawk emaw, chak leh battery heh lo zawk emaw, i hmu fuh a nih hlauh chuan i duh duh i install ve thei tawh bawk ang.. Mahse Custom ROM tam zawk hian bugs a nei tih erawh hre tel tho ta la.. Tin, firmware buai nakin hunah i mobile in a lo nei palh a nih pawhin i mobile mil Stock ROM download la, chu chu i SD card a dahin a thar angin i flash leh hmak thei ang.. Mahse Custom leh Stock ROM te hi i flash dawn reng rengin installation guide kha chhiar chiang la (ROM download page ah dah tel a ni nghal deuh zel), hrethiam lovin apply ve ngawt suh ang che.

FLASHABLE ROOT PERMISSION SCRIPT
Hei hi SuperSu zip file a ni a, recovery mode ațanga flash theih a ni. Engtin tin emaw i mobile a lo in unroot leh emaw, i unroot hnua root țhat leh i duh emaw, Custom ROM i install hnua root țhat leh i ngai emaw, i root permission manager kha khawchhak siam a nih a i replace duh a nih chuan download in SD/Memory Card ah dah la, i mamawh hun apiangah a hma a kan sawi recovery mode a i luh laia 'Install Zip' option ațang khan flash theih mai a ni.. Hei hi chu mamawh hun a awm țhin avangin a zip file hi kawl ve reng a țha khawp mai..

Download Flashable Root Zip 👉 SuperSu

PIMP YOUR MOBILE
Custom ROM install kher lo pawhin, developer ho țhahnemngaihna zar zovin, hardware leh thil dang vuah belh nisi lovin i mobile lan dan, rik dan engkim deuh thaw kha i ti danglam thei a. Chu chu root advantage pakhat leh bawk.. A module install tur zawng zawng sawi ka tum lova, mahni a inzirchawp zel atan kan dah ang. Chumi ti thei tura kan tih zeuh ngai erawh kan sawi zo zuai ang.. Lo ti ve chhin mah teh:

1. Xposed Installer hi click in i OS mil tur zawk download rawh.
2. I download zawhah install in hawng rawh.
3. Framework kha click la install tih kha click leh ang che. Reboot ngai a nih chuan i reboot zui nghal dawn nia.
4. A in reboot zawhah Xposed Installer bawk kha hawng leh la, Download ah khan lutin i OS milpui GravityBox download la, i install zawhah modules ah back la, modules ah lutin GravityBox kha i va tick zeuh ang a, i reboot leh ang.
5. A in reboot zawhah GravityBox hawng la, i duh tawkin i mobile lan dan leh menu te thlengin i siksawi kual thei ang.
6. Module dang țangkai tak tak pawh a la tam mai a, i hman duh leh mamawh chu download ațanga install in, modules a tick keuha restart/reboot lehin i mobile ah i function tir thei zel ang..

I ROOT RO RO A NIH CHUAN!
A. Battery: A hnuaia mi hi XDA developer ho pawn battery save theihna app an fak ber pawl a ni a, mahse root user mai bakah Xposed Installer install te tan chiah a hman theih a ni thung. I hmang ve duh a nih chuan:
1. Mobile root hnuah Xposed Installer install in binary update la
2. Greenify hi click in download la, install ang che
3. Exposed installer hawngin modules ah khan Greenify kha va tick rawh. Tichuan reboot la a tawk der.
4. I duh chuan Greenify app kha hawngin Experimental Settings ațang khan i duhdan in i set thei bawk ang.

B. Adblock: I root ta sa sa a nih chuan Ads block na atana developer lamin an siam, fak hlawh em em mai hi i hmang nghal duh law lawin a rinawm a, i hmang ve suh a nih chuan:
1. AdAway hi download in install rawh.
2. Adaway hawngin a chung ding kil lama pop-up menu kha hmet la, Hosts sources ah khan http://adblock.mahakala.is hi dah belh rawh.
3. I tih fel veleh (data off lovin) host update ang che. Tichuan Mother of All Ad-Blocks (MoaAB) sources nen i hmang kawp tihna a ni ang a, ads chu a block hneh tawh khawp ang..

Sawi tawh angin engkim hi i mobile mil chat chat i thlan a ngai a ni tih hria la, tih dik loh i neih vanga i mobile a buai palh ta hlauh a nih pawhin i tih dik loh vangin a kaihhruaina ziaktu hi mi dem suh ang che. Bangbo zawkte bo lo deuhna a nih beiseina vang chauh ziak ka ni si a..

I lo hlawkpui ngei beisei chungin i duhtawk leh phawt mai ang..

7 comments:

  1. A funin min hlui a ni ber e.Khawnge thet ham ham ang aw.

    ReplyDelete
  2. A funin min hlui a ni ber e.Khawnge thet ham ham ang aw.

    ReplyDelete
  3. A bengvar thlak tak zet ani keini ang hretlem tan phei chuan

    ReplyDelete
  4. htc desire 620g dual sim atan custom recovery mil hi ka va hmu thei lo ve aw

    ReplyDelete
  5. htc desire 620g dual sim atan custom recovery mil hi ka va hmu thei lo ve aw

    ReplyDelete
  6. FreedomPop is Britian's #1 ABSOLUTELY FREE mobile communications provider.

    Voice, SMS & data plans always start at £0.00/month.

    ReplyDelete

Blog Follow hmasa lo chuan Comment hi a dah theih loh ang!!