Wednesday 12 July 2017

MIUI ROM bihchianna!

A hma khan facebook page leh ka timeline lamah pawh ka ziak nual tawh a, ka lo sawifiah tawk lo nge bo tak tak, mi la rawn zawt nulh nulh kan awm leh țhin si a, a mal mala chhan reng ai chuan nakin zelah pawh a link pek mai theih turin kan post țha law law ang e. Ka hriat ve chin zawng..

Nia, MIUI ROM hi a kalphung hriatfuh loh chuan buai nuaih na tham hi a ni reng lah taka, chuvangin mawlmang thei ang ber leh kan hriatthiam theih ngei tura ziah ka'n tum ang a, chutah pawh kan la hriatthiam loh cheu chuan ka hre tawh bik lo le!

MIUI ROM hi Xiaomi Redmi device in Stock ROM (A tira company ina ROM a rawn hman) a ni a. Mahse hetah hian ROM chi hnih a awm. Hetiangin:

A) China ROM: China ROM ah chuan Gapps a awm ve lova, Google PlayStore leh Google Service ho hman duh dawn chuan Gapps flash chawp leh a ngai țhin. Chinese ho hman tur deuha duan a nih avangin System language ah pawh Chinese leh English deuh chauh a awm țhin a. Global ROM in a ken tel loh Chinese apps leh features eng eng emaw a keng tel nual țhin. China ROM hnuaiah ROM version chi thum - Alpha, Developer/Beta leh Stable ROM a awm leh a. Chu erawh a hnuailamah kan la hrihfiah thung ang.

B) Global ROM: Global ROM hi chu International a hman tura duan a nih avangin Gapps (Google Services) a keng tel nghal a, System language pawh thlan tur tam fe a keng tel țhin. Mahse China ROM a Chinese apps bakah a features ken țhenkhat erawh a keng tel lo thung. Global ROM hnuaiah hian ROM Version chi hnih - Developer/Beta leh Stable ROM  a awm ve leh bawk a. Hei pawh a hnuai lamah kan la hrilhfiah leh ang.

Chuti chuan China ROM chi thum leh Global ROM chi hnih a awm avangin MIUI hian Official ROM chi nga:
1. China Alpha ROM
2. China Developer/Beta ROM
3. China Stable ROM
4. Global Developer/Beta ROM
5. Global Stable ROM

a awm tihna a nih chu. He tia ngaihtuah mai chuan kan la buai nuaih mai thei a, han chhiar zel phawt la, i fiah thei em ang chu maw..

ROM sub-category - Alpha, Developer/Beta leh Stable te khi hrilhfiah leh ila, kan chiang hawk mahna le..

1. Alpha ROM: Alpha ROM hi chu China ROM ah chiah a awm a, Global ROM ah a awm ve lo. Developer ROM aia features update dawng hmasa țhin a ni a. Mahse hei erawh Xiaomi device zawng zawng tan a siam a ni lo thung. Hriat theih china he ROM hmang device te chu - Xiaomi Mi 2, Xiaomi Mi 2S, Xiaomi Mi 3, Xiaomi Mi 4, Xiaomi Mi Note, Xiaomi Mi 5, Xiaomi Mi Max te an ni.

2. Developer ROM: Developer ROM hi Beta ROM ti pawhin an sawi țhin a, ROM hran emaw tih loh tur a ni. Chinese holiday in a tibuai te a nih ngawt loh chuan kar tin update an dawng a, features thar lo chhuak tur miin an lo test theihna tur leh a dik lo lai an report ațanga Stable ROM siam lehna tur ROM ti ila a fiah mah mai thei. Entirna atan: Developer ROM ah feature thar an tihchhuah tur kha pakhat te tein an bilh tel a, feature thar an dah belh duh chin zawng update kaltlanga an bilh tel a, a dik lo lai (buggy) update kaltlanga an siam vek hnuah Stable ROM turin an siampum ta țhin a ni deuh ber.

Tin, Developer ROM te hi a version number atan an tihchhuah ni, thla leh kum a kha hman țhin a ni. Entirna'n: Dt. June 13, 2017 ah Developer ROM lo tichhuak ta se, chu ROM Version number atan chuan 7.6.13 hman a ni ang (7 hi 2017 ațangin an la a, 6 hi a thla, 13 hi a ni)

3. Stable ROM: Stable ROM hi chu Developer ROM a fel lo lai zawng tihfel hnua felfai thlapa an tihchhuah țhin ang a nih avangin a rei lo berah pawh thla khat tal update dawng tur hian a duh țhin. Bugs (felhlel ti mai ang) awm an tihdik (fix) hun rei chhung a zirin update awm hun hi a reiin a rei lo thei tih erawh hre ta ila.

Stable ROM hi chuan Version format ah 8.X.X.X ang hi a hmang thung țhin. 8 hian MIUI 8 a entir a, MIUI 9 a chhuah hunah chuan 9.X.X.X a hmang leh mai ang. X.X.X ve thung hi chuan kha MIUI a eng version ber nge hriatna tura a version number tihna a nih tâk ber chu.

Chu ta țanga chiang ta chu expert deuh leh data ren lo deuh lo tan chuan Stable ROM hman mai hi a felfaiin a awlsam mai a tih theih awm e. Tin, Developer ROM leh Stable ROM khi chuan China ROM leh Global ROM hnuaia mi kha a hrilhfiah kawp nghal ve ve tih hre tel ta bawk ila..

Tin, ROM Version hnung chiahah hian hawrawppuiin alphabet 7 a awm țhin a. Hei hi eng version nge kan hman hriatna atan a awlsam hle. Entirna atan "KHDCNDG" leh "KHDMIDG" hi lo hmang ta ila..

'K' in a ințan avangin kha ROM kha Kitkat based ROM ni tih a chiang sa ta a, Lollipop ROM chu ni se 'L' in a ințan ang a, Marshmallow chu 'M' a ințanin MIUI 9 lo chhuah hunah Nougat a hmang a nih phei chuan 'N' in a ințan tawh ang.

Tin, khi alphabet 4-na leh 5-na khi en ta ila, pakhat 'CN' awm a, pakhatah chuan 'MI' a awm thung. Hei pawh hian awmzia a la nei leh zel cheu! 'CN' hi chu China ROM ah dah țhin a ni a, 'MI' hi Global ROM ah dah țhin a ni thung.

Tikhan MIUI ROM chungchang chu kan fiah deuh kuar tawh turah ngaiin i duhtawk leh phawt ang..

Hetiang ang hmangchang chang hi i lo hmuha i lo chhiar ve zel duh chuan Muankima Khawlhring Facebook Page hi like satliah mai lovin, page a post thar awm apianga notification dawng ve zel turin lo Star/Follow ve ngei ang che.

5 comments:

  1. ������������

    ReplyDelete
  2. Beta Rom hi root na a mw ka lo ti a, fiah ta uar mai....Beta ho in a Miui 11 9.1 Androind an siam leh tur kha an hmag hmasa ber zel dwn a lo ni maw? an hman hmasak ber zel dwn chuan ava tha zwk ve...Beta Rom hman hi.....😁

    ReplyDelete
  3. Beta hian Miui 11 9.1 Androind te pwh an siam leh mai thei an ti in ka hria...tun ah pawh Miui 10 8.1 oreo an siam tawh ....

    ReplyDelete

Blog Follow hmasa lo chuan Comment hi a dah theih loh ang!!