Sunday, 20 June 2021

PAN Card leh Aadhaar Link loh thi dawn! A link dan hre lo te tan kaihhruaina..

Income Tax Act 1961, section 139AA in a phut angin Aadhaar Card leh Permanent Account Number (PAN) hi link ngei ngei ngai a ni a. A hma pawhin, 2017 daih tawh khan hemi vang hian a link dan tur PAN Card leh Aadhaar Card link dan ka lo post tawh a, mahse tunhnaiah India rama PAN Card pechhuaktu ber State Bank of India in timeline siam a, 30th June, 2021 hma a link lo te chu an PAN Card chu hman loh anga an ngaihsak dawn thu an chhuah tâkah chuan a tharin, kimchang zawkin kan post ṭha leh hluai mai ang e.

SBI NOTICE
PAN Card hi SBI customer te chauhin kan hmang lova, Bank hrang hrang customer te pawhin kan nei deuh vek tawh a. Tunlai khawvelah chuan a tel lova tih theih loh a tam tawh bawk nen tuman kan PAN Card a thih kan phal ka ring lo a (News ṭhenkhat chuan 1st July, 2021 a PAN Card thi zingah kan Card a tel ve a, kan la hmang duh si a nih chuan pawisa kan chawi deuh ṭalh a ngai dawn niin an ziak hlawm), chuvangin a thih lohna tura a link dan chi hnih hi mawlmang thei ang berin kan sawi ve chhin dawn ang e.

SMS hmanga link:
Mi zawng zawng hi English hrethiam vek kan nih loh avangin hei hi mi ṭhenkhat tan chuan a awlsam phian zawk ang a, mahse SMS hmanga link tur hi chuan main balance neih a ngai ang a. Tunlai pack kan thun hovah hian main balance a awm hran loh tlangpui avangin ₹ 10/20 man vela (service provider tin top-up plan a in ang lo a, sawi kim sen a ni dawn si lova!) topup thun hmasak a ngai ngeiin a rinawm. Tichuan:
1. UIDAI PAN Aadhaar_No PAN_No format hian i Aadhaar leh PAN number kha i type ang a (Entirna atan i Aadhaar No kha 199258827576 hi lo niin i PAN No kha PKZHL1798G hi lo ni ta se, i text type tur chu UIDAI PAN 199258827576 PKZHL1798G tiin i type dawn tihna a nih chu).
2. Tichuan i thu type kha i bank account leh aadhaar nena link na SIM aṭangin SMS hmangin 567678 ah emaw 56161 ah emaw i thawn ang a, prompt message lo thleng a zirin a failed leh tih ṭhat a, chuti khati chhung process a ni ang tih emaw a lo thleng a nih chuan i tifel der tihna a ni. I link sa chuan i link sa thu zâwk pawh a lo thleng mai thei bawk.

Online kaltlangin:
Hei hi mi tam zawk tan chuan balance thun chawp a ngaih dawn loh avangin a sam zawk ang. Chu mai bakah kan link tawh leh link loh hre lo tan check hmasak a theih tho bawk a. Online hmanga link duh tan chuan:
1. I PAN Card leh Aadhaar Card i link tawh leh tawh loh i chian tawh loh chuan 👉🏻 STATUS 👈🏻 hi click la, i PAN number leh Aadhaar No chhu lutin a hnuaia View Link Aadhaar Status tih kha a lo nung chiah ang a, kha kha click in i link tawh leh tawh loh i en hmasa thei ang. I la link lo a nih chuan step 2 ah i kal ang a, i lo link sa tawh chuan buaipui ve i ngai tawh lo tihna a ni mai.
2. I la link lo a nih chuan:
a) PAN Card leh Aadhaar Card link turin 👉🏻 LINK 👈🏻 tih hi click rawh
b) PAN number, Aadhaar Number, Aadhaar a hming i ziah dan leh i mobile number (Bank Account leh Aadhaar Card nena i link na number kha) i chhu lut ang a. Tichuan a hnuaia tick tur pahnih - I have only year of birth in Aadhaar card leh I agree to validate my Aadhaar details - kha tick in a hnuaia Link Aadhaar tih button kha a lo nung chiah ang.
c) Tichuan kha button kha i click ang a, i mobile a one time password (OTP) lo thleng kha enter in Validate kha i click leh ang a. Tichuan, bank a kal buai ngai lovin i link fel der tihna a ni mai.
Hei mai piah lamah hian ṭhenkhat chu PAN Card nei ve tawp, activate zui lem lova a number a mamawh te hnena lo pe ve mai te pawh kan awm thei a, chutiang tan chuan a rang lama PAN Card activate turin:
1. PAN Verification 👈🏻 hi click la
2. PAN Number, PAN Card a hming ziah dan, i date of birth (aadhaar card leh PAN Card siamna atana i hman ang ngei) leh i mobile number chhu lut la
3. Tichuan i mobile a one time password (OTP) lo thleng kha chhu lutin Validate kha i hmet leh ang a, midang tihbuai ngai miah lovin i activate/validate fel der a ni leh mai.

I lo hlawkpui ngei beiseiin duhtawk phawt ila, video tutorial ka siam peih tâk leh post hi edit in ka la rawn dah tel leh mai dawn nia..

11 comments:

  1. A hlawk thlak lutuk
    Midang tan i luangliam hi ka lawm a ka fak bawk che lawmthu ka hrilh che aw

    ReplyDelete
  2. A hlawk thlak hle mai. A lawmawm e.

    ReplyDelete
  3. Your PAN doesn't exist a ti mauh mai.Ka va bo em

    ReplyDelete
  4. Khawia maw kan chhut luh dawn

    ReplyDelete
  5. Pan card neilo bank AC nei si hi an awm nuk ngei ang a... an buai tho ang em?

    ReplyDelete
  6. A va ṭha ve. Kan ti chhina a in link tawh a rawn tia, a ngaihthat thlak ang chu maw... ka link lai pawh ka hre lo ania..

    ReplyDelete
  7. a hlawkthlak hle mai,,a lawmawm e, ka lo link tawh nih hi, i zar ah ka hre ta hlauh e.

    ReplyDelete
  8. Status click tur ka hmu miahlo,engtin nge ka tih ang

    ReplyDelete
  9. Aadhar leh PAN Card link-na 👉 https://eportal.incometax.gov.in/iec/foservices/#/pre-login/bl-link-aadhaar


    PAN Card hi State Bank of India pekchhuah a ni lo a, a pechhuaktu chu PAN card-ah khan a inziak kalh kha aw! 😁😁

    ReplyDelete

Blog Follow hmasa lo chuan Comment hi a dah theih loh ang!!