Fantasy Premier League bihchianna!

Fantasy Premier League chu engnge ni?
Fantasy Premier League hi Premier League behchhana game an siam a ni a. Hetiang deuh hian sports discipline hrang hrang leh Football League hran hranah pawh Fantasy League hi chu a awm hrang ve thluah a, a kalhmang leh kalphung hi in ang chiah chiah vek lo mahse a in ang deuh țhum hlawm.

He game hi riruatna hmanga khelh a ni ber ti ila fiah tak maw! Fantasy Premier League kheltu chuan ama team tur a lakhawm a, chu a team a player te kar tina Premier League lama an statistic behchhanin point a lo hmu ve ta țhin a ni. A player lakkhawm te kha kar tina inkhelziah an nih chuan point score a awl ang a, eng anga lar pawh ni se a tak rama bench a țhu tluan țhak țhak țhin a nih chuan kha player khan a kheltu tan point a hlawhchhuak ve dawn lo tihna a nih chu.

Entirnan: Fantasy Premier League ah hian team 1 ah player 15 chiah a neih theih a. Tunkarah Premier League khelh lo ni ta se, Fantasy League lama i player te zinga 8 kha Premier League lamah an Club inkhelh ah che țha ta em em se, 3 kha che țha vak lovin 4 phei kha chuan khel ve ta lo se. Fantasy league lamah chuan mi 8 point hmu sang tak leh mi 3 point hmu ve hram hram leh point hmu lo mi 4 i nei dawn tihna a nih chu. Chu point belhkhawm chu Fantasy Premier League lama i point hmuh a ni ang.

Fantasy Football hi a tira rawn duangchhuaktu chu English pachal - Bernie Donnelly niin Dt. 14th August, 1971 (Inrinni) daih tawha bul țan niin an sawi. Kum 45 a vei meuh chuan a game kalphung pawh a changtlung tawhin Football mai ni lovin sport discipline hran hran pawn changtlung takin anmahni pualin Fantasy League hi an lo nei ve ta fir fer hlawm ta hial a nih hi!

Tute'n nge Fantasy Premier League khel țhin?
Football tuipui tak tak leh game kalphung zirchiang peih, kar tina Premier League ena Club feeling dahțha a Football hmangaihna vanga game thlir thiam țhin an ni tlangpui a. Mahse a khel țhin te hi Premier League Club a țan ruh em em nei an ni deuh vek tho. Facebook leh WhatsApp vela inla hre satliah ang chi tan hmun a awm lem lo ti ila kan sawi sual tam lovang. A chhan chu țan bik leh nger lam nei ran tan Fantasy lamah hian point score a har fat țhin.. A nihnaah chuang suangtuahna hmanga team enkawl ang an nih ber avangin point hmuh san duhtu tan chuan a player duh ni lovin kar tina point țha tak score sak theitu tur kha a player ngainat loh pawh ni se a start tir a ngai miau a ni. Chuvangin khawvel puma football expert a kan ngaih tam tak te pawh hian vawiin thlengin an la khel nawk hlawm. Coaching lama rilru tih hmasawnna atan țhenkhatin an hmang a, țhenkhatin hunawl hnawhkhahna atan, a țhen ve thung erawh football expert an nihzia pholan tumin, chutih mek laiin a lawmman um ngawr ngawra khel pawh tam tak an awm ngei ang.

Engtia khelh tur nge!?
Step 1: Signup
Khel ve thei tur chuan in signup a ngaih avangin a hnuaia link ah hian click in i in signup ang
Signup: Signup/Signin turin click rawh

Step 2: Team i din ang
I signup zawh hlim khan £100m pek i ni ang a, Premier League a team 20 awm te ațangin i teama awm tura i duh player 15 - Keeper 2, Defender 5, Midfielder 5 leh Forward 3 i lei khawm ang. Tichuan i team hming tur pawh i duh ang ngei i thlang thei ang.

Premier League Team 20 a player duh duh i leikhawm thei ang a, mahse team khat ațangin player 3 chiah i lei thei thung ang. Chutih rualin i club țan rum rut ami chu player 15 tawp pawh i sumin a daih chuan i lalut thei ang a, a enga pawh ni se £100m chiah i neih avangin player 15 i lei tlin theihna tura i rilru i hman a ngai tih erawh i hriat a ngai. Team khat ațangin

Step 3: First XI, Captain leh Vice-Captian i thlang ang
Team din tura player 15 i lei tlin hunah pawh thluak bawk a ngai leh dawn. First XI i thlan fuh leh fuh loh a zirin i point score a san phahin san phah lo thei tlat. Chutiang bawkin point score țha vak ngai lo Captain leh Vice-Captain a i dah a nih chuan chuti hlauh. First XI te hi Premier League lamah an start lo a nih chuan a ho der! A khel ve lo khan point a score ve dawn loh avangin kar tin EPL lama player performance a zira i First XI hi i siksawi ve a ngai bawk ang, point score țhat i duh chuan.

Captain hian Premier League lamah a khel a nih chuan a score zah kha a double in i score ah a lut ang a. Chuvang chuan point score sang thei, khel ngei tur si thlan kha a hlawk. EPL lamah i captain a khel lo a nih thung chuan captain hamțhatna kha Vice-Captain in a nei leh thung ang. Mahse, vanduaithlak taka EPL lama an khel lo ve ve a nih chuan point double a score thei i neih loh kar a ni tihna a ni mai.

Step 4: Țhian leh midang nena inel
Khiti anga team i dinfel tawh hnu chuan midang elpui turin private group emaw public group emaw i siamin i zawm thei ang.

Hriat tur pawimawh dang
1. I player zingah khel țha lo leh khel nhai lo, point score sak ve ngai lo che an awm chuan transfer section ațang khan hralhin midang i lalut thei ang. Gameweek zawh apiangin 1 free transfer pek i ni ang a, chu chu a awmzia chu i point score sa cut lovin i sum hmang ringawtin mi i lalut thei tihna a ni. Free Transfer hi i pelh chuan player leina man bakah i point an cut zel dawn avangin hei chu tih chi viau loh.

2. First XI i thlan hian formation i thlak pawha buai lo tura an versatile dan i thlir thiam a pawimawh hle bawk.

3. Card hran hran hman theih turin pek i ni țhin dawn a, i hriatthiam theihna atan:
a) Wildcard: Hei hi ka hriatthiam dan chuan season khatah vawi 2, January Window leh Season start hma a hman theih tura pek kan ni țhin a. Gameweek point kan score sa hloh miah lova team a player 15 te thlak hlawk theihna a ni ti ila a fiah mai awm e.

b) All Out Attack: Hei hi season tluanin vawi khat chiah a hman theih niin ka hria a, formation danglam bik, chak ngei duh emaw team khelh te hneh loh dawn viaua inhriat țuma hman tur bik, duh duh huna formation thlan ve theih loh ang chi thlanna a ni.

c) Triple Captain: Hei pawh hi season tluanin vawi 1 hman theih a ni a. I captain leh vice captain te an khelh dawn leh dawn loh a chian loh karah, double point score loh palh theih a nih kara hman tur chi a ni.

d) BenchBoost: Hei pawh season tluanin vawi 1 chiah a hman theih a. Benchboost i hman chuan substitutes ho pawn point an score sak ve ang che. Mahse vawikhat chiah season tluana hman theih a nih avangin i player te an vaia khelh țhat lai bera hman chi a ni.

Lawmman lam ve thung hi!?
Hei hi mi tam tak khelh chhan ni mahse khawvel puma football expert tam takin an khelh tel ve miau avangin lawmman dawn hi thil awlai lo tak a ni. Kar bi ang te, thla bi leh season tluan ang tein lawmman hi chi hran hran siam a ni țhin a. Season tin a danglam ve avangin a hnuaia link ah hian lutin i duh leh tun season a Fantasy Premier League lawmman tur chu i en mai dawn nia. Tin, link pawimawh ho pawh a hnuai hi ka dah tel nghal e..

a) Prizes: Lawmman en turin click rawh
b) Statistics: Statictic en turin click rawh
c) Scout: Scout lam en turin click rawh
d) Fixtures: Fixtures en turin click rawh

I lo țangkaipui ngei beisei chungin i duhtawk leh phawt mai ang. Chutih rualin ka thil hriatah fuh tawk lo deuh a lo awm palh hlauh a nih chuan comment lamah kan lo thawhbelh ve zel mai dawn nia..

Hetiang ang hmangchang dang hi i la chhiar ve zel duh dawn a nih chuan Muankima Khawlhring hi facebook lamah like in lo subscribe ve ngei ang che..