Wednesday, 30 November 2016

WhatsApp+ hmangchang

Update an release hun laiin ka lo buai lai a ni sia, tlai deuh tawh mahse bangbo zawkte tan a sam zawk beiseiin kan share tho ang e. Tuna ka rawn share tur hi WhatsApp Plus ah pawh Abo2Sadam Mod bik kha a ni a, he page ah hian download a awlsamna atan version thar apiang lo update zel ka lo tum dawn nia..

Engnge WhatsApp+ chu!?
WhatsApp+ kan tih hian a mawlmang zawnga sawi dawn chuan PlayStore ami WhatsApp (Official Version) aia tih theih ngah zawk tura developer ten an siam danglam ti ila a fiah mai awm e. A tidanglamtu leh a version a zirin WhatsApp pangngai a Audio/Video upload size limit let thawk deuh thaw a upload thei hi mi tam zawkin an hlut chhan a nih laiin țhalai lam chuan a theme leh layout duhtawka a khawih danglam theih hi an duh chhan a ni tlangpui. Chutih rualin WhatsApp+ hi a thar ber pawh Official aiin a version a hniam zel tih erawh hre tel ta ila. A awmzia ah chuan PlayStore a version thar awm veleh developer ten lo download in an lo tidanglam kual ta a. An zawh fel a, an tlangzarh meuh chuan Official version thar a lo awm hman leh tawh tlangpui a. A chang phei chuan version 2/3 hial te pawh a lo awm hman țhin. Mahse, sawi leh sawi hnu, a hmang țhang tawh hi chuan an thlah phal meuh lo chu a nih hi..

Tin, WhatsApp+ hi a modder (tidanglamtu - Oggy, GB, Abo2Sadam etc) a zirin a danglam ve thei hle a. Tuna ka rawn share tur hi sawi tawh ang khan Abo2Sadam Mod a ni a, an site pawh Arabic in a inziak dul mai a ni. Mahse, OsmDroid in WhatsApp khawih danglam an bansan hnu khan developer lamin number 1 a an dah tâk fur hlawm si ah chuan hei ngawt hi ka hmang ta a. A hmang ve duh, bangbo zawkte tana a sam zawkna atan hetah hian Update awm apiangin download awlsamnan rawn update ve zel ka lo tum ang..

Engnge Abo2Sadam WhatsApp+ chu!?
WhatsApp+ chi khat, Middle East lam developer te siam danglam WhatsApp a ni a. WhatsApp modder tawh a zawnga taima ber nia mi in an chhal a ni.

Version pakhat an mod hian WhatsApp+, WhatsApp+2, WhatsApp+3 leh WhatsApp+4 te an siam țhin a. Heng category chi 4 te hian emoji hman chi 3 nei lehin WhatsApp+ pawh 3 ngawt a awm a, chutiang zelin a dang ho ah pawh. Chuvangin version 1 an mod hian chi hrang 12 an siam zel tihna a nih ber chu..

WhatsApp+ bik hi chuan WhatsApp Official in a hman țhin folder kha a chhawm nghal thei a, Category dang (WhatsApp+2, WhatsApp+3 leh WhatsApp+4) ho khi chuan data dahțhatnan folder dang an hmang. Chuvangin la hmang ngai lo, hmang thar tur tam chuan WhatsApp+ bik khi hman mai a sam ang..

Chutih rualin Dual SIM WhatsApp hmang duh tan pawh WhatsApp+ leh a khawi emaw ber hi a install kawp mai theih a. Tin, emoji a Oldface an tih hi WhatsApp emoji pangngai kha a ni a.. Hei hi hman mai tur a ni...

Tim, sawi tawh angin Arabic in an site hi an ziah avangin kei chuan PlayStore ami via browser hlir kha ka hmang a. Khami hmanga hawn chuan an țawng kha English in a lehlin tir theih a, a zia khawp mai..

Tin, Android Application reng reng, khawih danglam (Mod) a nihin Antivirus hian Virus angin a hmu fo a, hei hi application dangah pawh a ni zel. Mahse WhatsApp+ ah pawh GB, Oggy leh Abo2Sadam ho mod hi chu a him tih erawh hre tel ta ila.. (modder dang zingah him lo a awm palh takin..)

WhatsApp+ 5.30
He version ah pawh hian video call a la keng tel ta lo a. Mahse a danglam bikna langsar zual a hnuaia hi ka dah tel nghal e
- Base atan WhatsApp Official Version 2.16.310 hman a ni (Update awm leh hunah chuan video call a beisei ngam tawh ang)
- 100mb thleng audio a thawn thei (a pangngaiah chu 16mb chiah)
- 30mb thleng video a thawn thei (a pangngaiah chuan 16mb chiah)
- WhatsApp Camera hmanga thlalak chawp leh lak sa attach in editor a keng tel nghal.

Download:
1. Direct Download
2. WhatsApp+ download page
3. WhatsApp+ emoji versions

1 khi i click chuan a in download nghal ang a. I theih loh palh chuan 2 ah i kal mai dawn nia. WhatsApp+ ni tho si, emoji dang anga lang tur i duh chuan 3 ah i lut ang a, emoji nalh i tih ber hnuaia download button kha i click mai ang.

Tin, WhatsApp+2 leh a chunglam hmang tan hemi hnuaia other version download tih khu click in, mahni duh version hnuaiah, emoji hman duh ber hnuaia download tih kha click mai tur a ni ang

Other Version Download

Plus nuam vek u.. 😊

Thursday, 25 August 2016

Android Factory Reset Protection hi!

Smartphone tinte hian an product rukru laka a him dan tur kawng hi an zawng ve reng a. 100% security erawh kan la hlat hle.. Mahse a hma ai chuan security him tawh tak a ni a. Security app rintlak tak tak a awm chho zel ang bawkin SmartPhone inbuilt security pawh a him chho ve zel a, duhthu erawh a la sam lo hlawm hle..

He kan him zawkna tura Android hmangtute tana Google lam security chhawpchhuah thar ber chu Factory Reset Protection (FRP) hi a ni a. Lollipop chin ațangin hei hi a awm țan a. Lollipop OS hi 14 December 2014 a release a nih daih tawh avangin kum 2 liam ta daih kha he security rawn chhuahna chu a ni tihna a nih chu. Mahse inbuilt a 5.0 hmang sa ni lo (Mobile in a ken sa) version hniam ațanga Lollipop a update chawpah hian FRP hi a awm lo emaw ni chu aw.. Ka chiang bik chiah lo hei chu.. Tin, Android 5.0 device țhenkhat pawh hian FRP hi a keng lem lo cheu niin ka hria, an mobile ka khawihsak tawh ho ațanga ka chhut danin..

FRP hi kan him zawkna tura duan a nih laiin buaiphah kan awm ta zeuh zeuh a, FRP supported device hmang chunga FRP Security advantage hmang țangkai lem lo eng emaw zat kan awm nawk bawk, sawizui ngai turah ka lo ruat miah lova, mahse an buai hnua mangang tak tak ka tawn tak nual avangin chiang zawk leh mawlmang zawkin i han sawi dawn chhin teh ang.

FRP I HMAN DUH CHUAN:
1. I mobile i setup tirhin google account kha sign-in ang che. Google account i la neih loh pawn a thar mumal takin setup la, a details kha vawng reng ang che. (Google account him zawka set dan leh enkawl dan i hriat duh chuan Google Hmangchang hi i click mai dawn nia.)
2. Screen Lock kha None emaw Swipe emaw a dah lovin i hriatreng theih tur Pattern/Password Lock in dah ang che. Tin, i mobile screen thim ruala automatic a in lock nghal turin i dah dawn nia. (I theihnghilh palh a, i mobile i reset duh a nih chuan Pattern Lock i tihbuai palhin.. hi i click mai dawn nia. Mahse FRP hmang tan chuan google account log-in detail khi hriat a ngai tho.)

Tikhan i set fel der chu a ni mai. Khitianga i ti a nih chuan i pattern/password hre lo khan lo ru ta se factory reset a ngai ngei dawn a, mahse i gmail leh a password tel lova reset a complete theih dawn loh avangin hmuhlet theihna chance i nei sang sawt ang.. Off in on țha leh pawh nise i gmail leh password tel lo chuan i in boot tlang thei tawh dawn lo..

NB: Hei hi bypass dan la awm cheu mahse misual kan pui mai mai a ni thei sia chulam chu ziak lo mai ang. FRP chungchang hriat loh vanga buai tan chuan mobile siamna dawr pan mai chi.

FRP I SUT LEH DUH CHUAN:
FRP hi i hmang a nih chuan, or google ah i sign-in hrim hrim a nih chuan, reset lem lova i mobile i hralh dawn a nih chuan a leituin nakin lama an rawn tihbuai lohna atan che hei hi i tih ngei ngei a ngai.. (Social app ho zawng zawnga i log-out vek a ngaihzia chu i hre tho turah dah ta ila)
1. Mobile ațangin i Google Account i remove ang.
Or
2. Developer Option enable in Settings a Developer options ah khan lutin OEM Unlocking ațang khan i sut thei bawk.

Chuvangin kan la bangbo hle a nih chuan, hmangchang hria leh mi chimlim deuh kan hriat pana set fel tira log-in detail pawimawh zawng zawng note bu (lehkhapuan) a ziah chhuah a dahțhat mai hi kan him zawkna tur a ni. Gmail duh duhzat a siam theih vanga gmail leh password theihnghilh mai țhinte hi a buai leh țhin an nih vangin nang chu lo fimkhur ang che.. A bikin Android Lollipop 5.0 chinan ngat phei chuan..

Thursday, 30 June 2016

Laisuih™ - Mizo Android Notepad

Laisuih™ chu engnge!?
Nia, zawhna awm tak pawh a ni. Android Modded app a ni a, Mizo mipui a mawlmang leh bangbo ber tan pawha hman theih tura Mizo țawnga dah a ni. He android notepad hi mawlmang hle a, gmail hmanga note a backup thei leh Mizo țawnga duan a ni hian a tizia hle a. Tin, a size te hi storage emaw RAM emaw nei lian lem lo tan chuan hman tinuamtu a ni ngei ang..

A țangkaina tur ber chu, nakin hunah iOS or Mac Device kan hmang a nih pawhin, android kan hman laia kan note ziah, gmail a kan sync luh sa buai miah lova kan sync lut leh pap pap thei tur hi a ni! A him dawn riau..

Version 1.0:
Hei hi iNote base a hman a ni a, a mawlmang lutuk hi tlema vengva deuh chuan an khawpkham lo deuh zel. Folder a siam theih loh a, text note atan a ni deuh tawp.. Mahse chuti chung chuan Version 2.0 aiin a size a lian zawk cheu.. Android 2.3 leh a chunglam tana hman theih tura duan a ni a. Mahse OS hrang hrang leh device hran hranah ka test lem lo. Lollipop leh Marshmallow chu a support lo mai thei bawk..

Application Name: Laisuih™
Version: 1.0
Package Name: muankima.khawlhring.laisuih
File Type: apk
File Size: 1.76mb
Download: Hetah hian click rawh

Version 2.0:
Version 1.0 hmangtute zingah folder siam theih duh an awm vangin hei hi buaipui leh a ni a. Base atan iNotes hmang tawh lovin GNotes hman a ni ta thung. Android OS 2.3 & up hman tura duan ni mahse hei pawh device leh OS hran hranah ka test lem lo. A hmang thei tan chuan Cloud backup support Android Note zinga size lian lo ber pawl zinga mi a nih dawn avangin V2 hi chu a hlu nek mai thei. Hna țul dang ka ngah sia device/OS hran hrana test tir hmasa kher lovin ka upload ta mai.. Tin, Menu hmet lang turin application hawn lai khan mobile screen a System Menu button kha hman a ngai a. Device/OS țhenkhat, Menu aia Recent App awm ho tan chuan a hmeh lan dan tur zawn chawp a ngai mai thei!

What's new?
- Application in Security Lock a ken tel hmangin note mal leh a app ang tawp pawhin lock theih a ni.
- Folder siamin thuziak a rem fel theih.
- Text note mai ni lovin picture, video leh file hmang pawhin note a siam theih.
- Midang hrilhna atan share button a awm nghal a.
- SD Card a backup na a awm tawh (Gnotes folder ah a in backup ang)
- He post link hi a awm nghal a
- Gnote layout a hmang ta thung a
- Mail in feedback a pek theih tawh a.
- A hma aiin a tein a zâng ta zawk a, hmuh a nuam ta zawk bawk.
- Checklist, notification, font leh note display dan te a customize ve theih ta bawk.
- A dang la awm te chu lo belchiangin lo zirchiang tawh mai rawh.

Application Name: Laisuih™
Version: 2.0
Package Name: muankima.khawlhring.laisuih
File Type: apk
File Size: 919.56Kb
Download: Hetah hian click rawh

Tih loh tur!?
Version khawi zawk zawk pawh hi SD Card ah i move a nih chuan feature țhenkhat hman theih loh i nei dawn a. Chuvangin full feature a hmang tur chuan (Widget, Pin etc) a install na hmuna i awm tir tawp a ngai thung..

Lo hlawkpui ngei nang che u.. ✌😇

Tuesday, 28 June 2016

EmKeyboard™ - Mizo, Smiley leh Rupee Keyboard ngai tawh lo tur chu!

Sawihawnna:
Android ka hman hnu hian keyboard hi ka hmang kual nasa ve ta hle mai a. Ka mimal hman bikah chuan Google Keyboard tluka hman nuam tih hi ka nei ngai lo.. Emoji keyboard leh Mizo keyboard install tel lovin a hman theih nghal vek te hian space leh RAM min heh lo tir bawk nen, ka hmang deuh ta char char a. Mahse user neih tam duha google keyboard application an compress nasat tâk ațang hian amaha lo in stop in error notice a lo pop ta zeuh zeuh fo a. Chuvang chuan a thlakna tur ngaihtuahin thla khat dawn mai keyboard hran hran ka chhin kual a. Emoji support, multi-lingual (țawng hran hran support) ah pawh Romanian (Romana) support ngei, installation package (apk) file lian si lo, a layout vela google keyboard ang si ka zawn hmuh tak ngang si lovah chuan ka hman tur bik liau liauin he keyboard hi mi siamsa tidanglamin ka duang ta ngawt mai a. Hmanah tawh Mizo Keyboard Lite siamtu Lalsangpuia Ralte nen kan sawi dun chiam tawh a. Google Keyboard a compress theih thu a sawi vang khan a rawn khawih hun ka lo nghak ve ngar ngar a. Mahse kum 2 lai a vei ta si a, a hnaah a lo buai bawk nen ani angin tite thiam ve lo mah ila thiam ang angin ka sawngbawl ve ta rawih mai a ni. Keyboard dang nena hriathran theihna atan a hmingah EmKeyboard™ hi ka thlang ta a ni. Keima hman dan bikah chuan system a keyboard install zawng zawng peihin hei hi system ah ka install thung a. System a keyboard awm sa ho kha a vaiin 26mb vel a nih laiin 8mb vel chiah system-ah keyboard apk in hmun a luah ta a, 18mb vel ka free belh phah tihna a nih chu..

Google Keyboard vrs EmKeyboard™?
Google Keyboard hi 16 May, 2016 khan Version 5.0.25 release niin hei hi Playstore ah chuan 14.52mb anga tarlan ni mahse install hnua backup hian a installation package file (apk) len zawng hi 21.1mb vel a ni thung. Apk len zawk vang leh crash a awm zeuh zeuh fo tih lohah chuan system storage & RAM nei lian tan chuan a thlanawm zawkin ka hria. Ti ila, data a lo ei hek ve țhin erawh Google Keyboard ka duh lohna ber pakhat..

Android OS dangah EmKeyboard™ hi ka la test lova, mahse keimahah chuan vawi khat mah crush a la awm lo. Data hi ei hek ve lo turah ka ngai a. Google Keyboard aia ka thlan tâkna chhan ber chu a installation package te leh update a ngai ve tawh lo tur hi a ni..

EmKeyboard™ chu?
App Name: EmKeyboard™
Package Name: muankima.khawlhring.keyboard
Version: 1.0
File type: apk
File Size: 7.75mb
Download: Click here

Layout ah chuan Google Keyboard layout leh Icon ka hmang a. A dang pawh a in ang deuh vek.. A in an lohna chu smiley key a lang sa (google keyboard ang tho khan enter key long press in smiley hi a hman theih tho bawk) hi a ni. Tin, data consume ve lo tura ka ngaih (ka test mek) leh update notification awm ve tawh lo tur (a thar ka siam peih tawh kher lovang) hi a danglamna chu a ni deuh mai.. 😆😊

Mizo Keyboard leh Indian Keyboard install ngai lo turin!?
Â/â, Ê/ê, Î/î, Ô/ô, Û/û, Ț/ț leh ₹ te i hmang duh a nih pawn he keyboard ah hian a hman theih vek a, a nihna takah chuan hei hi Google Keyboard ka hman țantirh lama ka zirchhuah a ni. Default keyboard ah English a nih vangin a vai khian a keng lo a. Mahse ka hman duh hunah language hi ka switch zeuh zeuh mai. Hetiangin:
1. Keyboard settings ațangin language kha default hmang lovin English (US), Romanian (Romana) & Hindi ka select a. Spacebar long press a switch theih ni mahse a sirah language switch key a lo awm ang a. Hei hi spacebar sei duh tan chuan duh leh off mai tur a ni.
2. Ka hman dan chuan default ah Romana kha ka hmang a, mahse Romana ah hian Ê/ê, Û/û, Ô/ô a awm ve loh avangin hman dawnah space bar long press in English (US) ka select keuh a, hman zawh veleh Romana ah ka dah leh nghal mai țhin.
3. Chutiang chiahin ₹ hi Romana ah a awm ve loh avangin hman duh hunah spacebar long press in Hindi ka select a, hman zawhah Romana ah ka dah leh mai.
PS: Google Keyboard thar berah erawh English (India) ah Rupees symbol a awm vangin Romana nena select kawpin language 2 switch chiah pawhin a theih thung.

Language key switch dawn khian space bar long press a ni mai a, language switch key i on phei chuan khami hmeh keuh khan a in rotate zel ang..

Min pui thei ang em?
Sawi tawh angin he keyboard hi OS dangah ka la test ve lova, i lo download a i lo test ve a nih chuan a hnuaia mi ang hian i OS sawi telin feedback min rawn hrilh thei la ka lawm hle ang..

Cupcake: 1.5
Donut: 1.6
Eclair: 2.0–2.1
Froyo: 2.2–2.2.3
Gingerbread: 2.3–2.3.7
Honeycomb: 3.0–3.2.6
Ice Cream Sandwich: 4.0–4.0.4
Jelly Bean: 4.1–4.3.1
KitKat: 4.4–4.4.4, 4.4W–4.4W.2
Lollipop: 5.0–5.1.1
Marshmallow: 6.0–6.0.1

In țhian,
- Muankima Khawlhring

Tuesday, 7 June 2016

A thlawnin khawvel pum a inbiakpawh theih ta!

Khawvel hi a va han changkang tawh tak em! SmartPhone era ah chuan internet pack hi mitin mamawh a lo ni chho țan ta a.. Chutih vangin Service Provider lamin SMS leh Call min free phah chuang si lo.. A nihna takah chuan data man pawh hi kar lovah an san chho awk awk a ni zawk mah.. Chutiang a nih takah chuan mamawh kan neih belh hi a ni ta ringawt a, tun hma a țul lo (internet pack) kha kan nitin nunah a țulin a țul ta zek zek si a.. Chuvangin kha i pack hmanga call i hman man tur i lo save theihna kawng hi i la hriat fuh ve loh takin kan share ve hrim hrim ang e... I lo la hre ve lova, android i hmang a nih ngat chuan thu lawmawm tak a ni ngeiin ka ring..

Khawvel pumin Networking lama a mamawh chu hriain Local leh STD mai ni lova, National leh International call thlenga a free a kan hman theih dan tur lo ngaihtuah ru char chartu Chetah Mobiles (Stubborn Trojan Killer - Ghost Push fighter siamchhuaktute tho kha) te chuan hman deuh tawh khan WhatsCall Application an siam chhuak ta a le.. Ni telin hmangtu an pung chho tual tual mai zawng a nih hi.. Khawvel pum ami tu pawh a thlawnin i be thei dawn ta a, main balance a la kal lo zui! Chutiang chu i mamawh thil a nih chuan he application hi lo belchiang ve mah teh..

Install WhatsCall from PlayStore

Features:
WhatsCall i hman chuan?
WhatsCall i hmang a nih chuan phone bill chawi i ngai kher tawh lo ang a. Khawvel khawi hmun pawh nise a thlawnin i be thei tawh ang. Tunah hian mi 200k chuangin he application hi an hmang tawh a. Nitin 2,000+ (i.e, 30+ mins) i hlawhbelh ziah theihna tur plan he application hian a la keng sa zui!

Unlimited FREE Call?
Sawi tawh angin he service hian offer hran hran a keng tel a, heng te hi ads lo click mai emaw, video lo en mai emaw leh țhiante invite hmanga te a ni hlawm a. I taihmak leh free call balance i ngah ang a, WhatsCall hmang ve lo te biak theihna tur i ngah deuh dawn tihna a nih chu!

WhatsCall to WhatsCall?
I țhianin WhatsCall a hmang ve a nih chuan he app kaltlang hian main balance kal miah lovin WhatsApp call ang khan data (internet pack or wifi) hmangin in inbe thei dawn tihna a ni a. A lo hmang ve lem lo a nih pawhin i free call credit ațangin i biak theih mai bakah data hmanga inbe turin i invite thei a. A lo join hunah app kaltlangin a free in in inbe thei ang. I invite vanga a lo join a nih phei chuan rewards (free call minute) i la dawn belh zel dawn zui! He application hi ram 230 chuang zet ațangin an hmang tawh zu nia!

Video Message lam te?
He app vang hian mi tam takin voice mail an lo mangțha phah tawh niin an sawi a. Video messaging a ken tel hmang hian, i call pickup thei lo tute pawh i thil hrilh duh pawimawhzia kha video message in ila thawn thei zui..

Voice Call quality lam ve thung?
Inbiakpawhna lama khawvela company țha ber berte nen an inthlunzawm bakah advanced voice coding leh decoding technology an hman avang hian WhatsCall lam pawh hi he IP-PSTN innovation leh optimization ah kher kher hi chuan an inti thei ve khawp mai a. A quality a chhe hran lovang tih a hriat theih.. Mahse internet connection ring a nih vang erawh hi chuan net connection chuan kori a tu viau ang tih a hriat sa a, tin, call pangngai aia țawng speed muan chang a tam ang tih pawh a hriat..

Free Call Credit hlawhbelh dan tur hi?
WhatsCall i install zawhah in sign-up in hawng la credits ah khan lutin a hnuai ami ang hian free call credit i tuak dan tur an lo chhawp sa ang che..
1. Daily Check in: +100
2. Just tap it: +100
3. Invite friends: +1000 x 1
4. Complete task: +500-50,000

#1 leh #2 hi a harsa lova mahse points a ken a tlem thung a. #3 hi țhiante invite hian points chu a keng zia viau a, mahse an lo install a, an lo in sign-up nghal a nih lem loh chuan credit kan dawngkher lo. #4 hi a harsa ber a nih angin point hlawh theih zat erawh a sang ber thung.. Lo bih chiang ve ngei ang che..

Foreign leh national call hman ngaihna a chhungte emaw țhian nei tan emaw phei chuan application țangkai tak tur a ni. Chuvangin chiang zawka i belchiang duh a nih chuan a hnuaia link hi click in PlayStore ah lo belchiang la, i duh ve a nih chuan i lo install mai dawn nia..

Click > HERE TO VISIT PLAYSTORE

Tin, free sms lam duhzawk tan pawh a hnuaia post hi click a zirchian mai theih a ni bawk..

Click > Free SMS for Android < here

Saturday, 7 May 2016

Google hmangchang!

Kan sawi kim vek seng dawn lova, a hriat pawh ka hre bik vek hek lo, mahse nitin SmartPhone hmang thar leh Internet hmelhriat thar kan awm ve zel si a, bangbo zawkte tana țangkaina mual mual a neih takin..

THIL ZAWN DAN
Kan mobile leh computer buai changin midang kan rawn kual duk duk fo țhin a. English awmzia hrethiam chin tan chuan hetianga kan buaina tam zawk hi Google kaltlanga solve theih deuh vek a ni. Hetiang hian lo tive mah teh:
1. I computer/mobile a error notice awm ang chi chu a error notice kha chhinchhiah ang che.
2. Google ah kalin search box ah khan a error notice kha chhu lut tawp la, a tawpah device hming, OS leh solved tih dah belh zeuhin search tawp rawh. (Eg: unfortunately playstore has stop Samsung J2 Kitkat solved)
3. I buaina kha error notice awm lo chi a nih a, a solution zawn dawnin a zawn tir dan tur sentence i siam thiam lo a nih pawhin i hriat lai lai kha a sentence puitling kher lo pawhin type lut tawp la, search tawp mai rawh. (Eg: Root without PC Samsung J1)
4. Google search engine hi i hman tam poh leh thil zawn dan hmangchang thar i hriat belh zel dawn avangin Facebook group a zawhna zawha nghah vung vung ai chuan emaw, mi buai loh kar changa zawh tuma nghah ngar ngar emaw ai chuan google rawn zel mai la, a rang zawkin i thiambelh zel dawn zawk a sin.

GMAIL RECOVERY MOBILE NUMBER
"Ka gmail password ka theihnghilh a, ka recover thei lo.." ti hi kan awm leh nawlh nawlh țhin. Chuvangin i buai hmain hei hi lo check ve teh:
1. Chrome ațangin Google Account Management Page ah kalin sign-in rawh.
2. "Personal info & privacy" section ațang khan Personal info kha select la
3. Phone kha i select leh ang
4. Mobile number a lo awm loh chuan Add Recovery Phone kha i thlang ang a, SIM dang i hman tak vanga i number thar i update duh a nih chuan Edit kha i thlang ang.
5. Tichuan instruction kha uluk taka chhiarin i complete mai dawn nia.

Tichuan i gmail buai pawh SMS code hmangin i recover zel thei ang. Chuvangin number i thlak reng rengin i mail ah update nghal zel ang che. Fimkhur hi a inchhirawm loh a nia!

GMAIL PASSWORD RECOVER DAN
A chunga kan sawi tak ang khian i mail ah i number i dah tel a nih tawh chuan password theihnghilh palh pawhin recover a har tawh lo. Hetiangin:
1. Google Password Recovery Page ah kal la
2. “I don’t know my password” tih kha select rawh.
3. I email address enter la
4. I mobile a SMS an lo thawn a code kha a enter na tur laiah enter/type/paste la, instruction ang zel khan password thar i set mai dawn nia.

GMAIL PASSWORD THLAK DAN
Eng emaw thil vangin, a him tawk lo or midangin an lo hre ve a kan rinhlelh vang leh thil dang dang vangin, mail password hi thlak duh chang a awm thei a. Chutiang bikah chuan:
1. Chrome ațangin Google Account Management Page ah kalin sign-in rawh.
2. "Sign-in & security" section ah khan, Signing in to Google kha select rawh.
3. Password select rawh.
4. I password thar tur i select hnuah Change Password kha i select mai dawn nia

GOOGLE PASSWORD HMANGCHANG
1. Password hi character 8 tal a nih a ngai. (Eg: Muankima)
2. Capital leh small letter in lukhawng a nei. (Eg: 'Muankima' tia password i set chuan 'muankima' tiin a login theih loh ang)
3. Alphabet leh number a hman theih a, alphabet hlang emaw number hlang emaw pawh a hman theih.
4. Password bul țanna leh tawpna ah space a hman theih loh a, a laiah erawh a theih. (Eg: Muankima Khawlhring)
5. Android OS 5.1 chinah chuan mobile reset complete turin gmail hmanga unlock a ngai țhin a, chuvangin password reset thar hlim, darkar 24 ral hma chuan i buai palh lohna'n reset loh tur a ni.

Ka hman tawh hrih tlat lo, hun lehah #Hmangchang dang nen kan la inhmu leh dawn nia.. Lo fimkhur ula, lo him ula, lo him ang che u.. 😂💦

In țhian,
- Muankima Khawlhring

Thursday, 5 May 2016

Android Device Security hmangchang

- I mobile kha bo palh ta se, FIR pawh thehlut mah la tih ngaihna vak a awm lo. IMEI hmanga trace i duh dawn a nih pawhin i lei hlima i register te a nih ngawt loh chuan a bo hnuah awmzia a awm tawh lo. Chuvangin i lei thar hlima register i duh chuan: (a) trackimei.com
emaw (b) androidlost.com te hi lo bel chiang ve teh.

- I mobile a i google account hman lai leh a password bakah recovery option te kha theihnghilh ngai suh ang che. Haihawt tak i nih pawhin note ah ziak la, chu note chu i mamawh huna en theih turin dah țha mai rawh. Tuna i hman mek kha i hre tawh lo a nih chuan remove in a thar siam la, chhinchhiah vek rawh. I thiam lo a nih pawhin a thiam pan mai rawh. Lollipop chinah phei chuan reset complete turin google account (gmail) hman lai a unlock a ngaih zel tawh avangin nakin huna i buai phah hlauh ang e.

- I lei hlimin i mobile siamtu Company ten security system an lo dah sa kha a nih tur ang takin setup ang che. Kha khan a bo palhin a setup lo te aiin hmuhlet leh theihna chance a neih tam tir che. Entirnan: Samsung ho ah chuan Samsung Account ah a tira i sign up khan a bo hnuah Samsung Official Site ațangin trace na chance i nei. Mahse a tam zawkin kan sign up lo fo si. Gionee ah chuan NQ Security dah a ni a, SIM an lo thlak pawha Alert dawng thei turin a set theih. Brand dangah pawh security hi chu an dah deuh zel a, lo inzawn chhuah ve mai teh..

- Mobile settings > Security > Device Administrators ah khan Android Device Manager a awm a nih chuan activate la, open nghalin i gmail, a login details i hriat reng tur ngei hmang khan sign-in ang che.

- Heng kan sawi ang chi ho hi i mobile in a keng sa lo a nih pawhin lungngai suh, PlayStore ah Anti-Theft application a tam lutuk. User feedback chhiar la, an rating pek en bawk la, rintlak bera i hriat install la set up ve mai rawh. Mahse Device Administrators ah khian activate ang che.

- Mobile settings > Security > Device Administrators ah kal la, Owner Info ah khan i hming leh contact number dah ang che. Tichuan, mobile screen kha lock la, ruk ni lova i tibo palh a nih chuan a chhartuin i mobile hawng thei lo mahse i hming leh contact number a hmu ang a, mi pangngai a nih chuan a lo call mai turah che ngai phawt ang.

- Mobile settings > Security > Device Administrators ah tho khan Encrypt Mobile/Phone tih lo awm kha set-up la, i security code theihnghilh loh turin lock ang che.. Tichuan i mobile restart/switch on apiangin kha code kha barh a ngai zel tawh ang.

- Heng kan sawi tak security ho pawh hi i mobile kha an lo reset emaw an lo flash hman emaw a nih chuan awmze nei lo vek a nih dawn avangin a bo tih i hriatrualin trace dan ngaihtuah nghal ang che. Hmu kir leh tura i hun țha i bawhpelh hlauh dah ang e.

A kim tawk lo hle ang tih ka hria, mahse hei chin ngawt pawh hian nasa takin mi a puih ngei ka beisei. SmartPhone Era an tih hial khawpin mobile changkangin kan nitin nun a luah chho a, neih bak baka pukchawpa lei te hial kan awm lai hian, a fimkhurna lamtluang hi kan zawh lo fo țhin si a.. I him theihnan, an him theihnan, he blog post hi > http://goo.gl/I6OMTa < lo hrilh chhawng ve zel thei la a va lawmawm dawn em..

Tuesday, 3 May 2016

Google Talkback leh a off dan..

Android Device tam zawkah hian Google Talkback hi bilh tel sa a ni ngei mai a, android mobile zawng zawngah an bilh tel vek em tih erawh ka chiang mai bik lo..

He application hi mit țha lo te hman tura duan niin google lam chuan an sawi a. Mahse, a mit țha zawk ngei ngei te pawn an ON chuan an buaiphah deuh zel avangin ka root sak ho ațang hi chuan ka paih hmak zel..

I khawih kualna lamah engnge a nih hre lova i lo on palh a, i buai a nih chuan a hnuai ami ang hian Off lo tum ve teh..

Talkback hi Mobile Settings > Accessibility > Talkback ah khan i ON in i OFF thei ang a, mahse chhin i duh vang maiin lo ON ve ngawt suh. I sut leh thei lo palh hlauh dah ang e..

A off dan chu:
1. Talkback hi i ON chuan hmeh vang vang (Long-tap/press) hnua vawi hnih hmeh (double tap) leh nghalin Select theih a ni chauh a. I duh select dan tur hi chhinchhiah ang che, i Off hma zawng i mamawh mawlh mawlh dawn si a.

2. Step 1 a select dan tur ang khian home select rawh.

3. Step 1 a select dan tur ang tho khian app drawer (app i install ho lo lan tuarhna kha) select rawh. Home screen ah mobile settings shortcut i dah sa chuan hei hi ngai lovin Step 4 ami ang hian settings ah i lut nghal thei.

4. App drawer ah khan Settings icon a lo lang nghal lo a nih chuan i swipe (tuai tawlh) a ngai dawn a. Mahse, Talkback ON lai chuan kutzungțang pahnih (2) hmanga swipe a ngai tih hria la, Settings Icon lan hma swipe rawh. Tichuan a select dan tur tho khan Settings lut turin i select ang.

5. Settings i luh theih chuan Accessibility i hmuh theihnan kutzungțang pahnih (2) hmangin i swipe leh ang a. I hmuh hunah select dan tur ang khian Accessibility lut turin select rawh.

6. Accessibility i luh theih chuan select dan tur ang khian Talkback select rawh.

7. Talback i hawn theih chuan select dan tur ang khian toggle (On/Off na kha) select rawh.

8. Confirm turin "OK" lo pop kha select dan tur ang khian lo select rawh.

Heng step 8 hi i paltlang a nih chuan i mobile touch kalphung pangngai i hmang leh thei ta!

He buaina hi nangmah mai ni lovin i chhungte leh țhiante zingah tawk mek an lo awm reng thei a, tawk thut thei reng in ni bawk. Chuvangin he post hi tunah emaw, nakinah emaw i la țangkaipui ngei beisei chungin i duhtawk leh phawt mai ang..

In țhian,
- Muankima Khawlhring

Wednesday, 27 April 2016

Facebook username hi!

Hemi chungchang hi min zawt an awm leh țhin avangin, blog leh page ah post hlui awm sa share mai tumin ka hai chiam țhin a. Blog lamah chuan ka lo dah chiah lo a nih hmel.. Kum 4/5 liam ta khan a zul deuh chu dah tho mah ila.. Chuvangin hai chhuah a awlsam zawkna atan kan post tlai khawhnu ang e..

Kan ramah chauh lo pawh Media lamin milar leh mi hlawhtlingte an kawm chang hian facebook a hming dah dan hi an inzawt fo a. Nakin lawkah chuan "I facebook username min hrilh thei ang em?" tih hun pawh an la nei ngei ang..

Chuvangin facebook username chu engnge a nih kan chian ve hrim hrim hi thil pawi a ni lo!

Facebook username chu:
Facebook a hming atana kan hman hi username ni lovin profile name zawk a ni a. Hei hi chu in ang chiah chiah pawhin mi tam takin an hmang thei.. Mahse tuna kan sawi username hi chu in ang pakhat mah a awm thei lo. Chuvangin profile name ni lova username zawk hi midang kan hrilh a nih chuan, an tan zawn hmuh kan awlsam a, kan profile name ang chiah nei pawh lo awm se, a dik lo add buai ngai lovin keimahni min rawn add chat chat thei dawn tihna a nih chu..

Tin, messenger (WhatsApp/Hike/Viber etc) lama hmelhriat inchhar, facebook lama inkawmzui duhte, țhianhlui leh thawhpui hlui inbiak thar leh dawna inhrilhna atan te, midang account inhrilhhriatna atan te (Browser ațangin an profile a lutin about tab a facebook tih zawna link kha copy mai tur), kawng hran hrana țangkaina a neih avangin hei hi kan la bel/chiang ve lo a nih chuan tihian i ti teh ang:

1. Mobile Number Verification Page ah lut phawt la, i mobile number kha verify phawt rawh. I verify tawh a nih chuan a hnuai ami ang hian a lo awm ang a, step 2 i kai thei a ni mai:
Your mobile phone has been successfully verified, and you are signed up for Facebook Mobile.

Step 1 bik hi chu facebook account security atan a ngaih avangin tih mak mawh a ni a, kan ti sa deuh vekin a rinawm. A ti lo chu account pawh a chhe duh nge nge.. A tlangpui thuin..

2. Username Page ah lut phawt la, a hnuaia mi ang deuh hi a lo awm em?

Your username is already set..
You can direct your friends to facebook.com/kenny.muankima

A lo awm sa a nih chuan username i set tawh tihna a ni a. A chunga kan example pek tan hi chuan a țhiante hnenah "fb.com/kenny.muankima hi lo invite in min lo contact rawh.." a tih theih dawn tihna a ni chu. (username hi browser ațang chuan mahni profile ah lutin about tab ah khan a en theih bawk ang). Tunhnaia account siam thar hoah username hi an pe sa em ka hre lo a, pek sa a nih lem loh chuan tunhma ang khan khi link ah khian username a set theih nghal ang.

3. A lo awmsa chuan facebook.com/ zawh chiaha lo awm zawng kha i username chu a ni a, login nan pawh email/no aiah kha kha i hmang thei a. Tin, i account link midang i pe duh a nih pawhin i username hma-ah khan fb.com/ i dah belh anga i pe keuh thei. (Eg: fb.com/kenny.muankima)

Tichuan inhai palh leh tum loh pui pui invite phah kan awm tawh lovanga, account buai palh chang pawhin recover a awl sawt tawh ang..

Group leh Page Admin tan:
Tin, a bikin Mizo Page/Group ah username set lo hi kan tam khawp mai a. Fb page chu #1 ațang khian set mai theih a ni a, group chu group settings ah a awm nghal țhin a, a la awmin ka ring. Chu chu kan set fel a nih chuan midang hnena group/page link pek kha a awl zaih mai țhin, number sei tak tak kha ngai tel tawh lovin..

Entirna'n:
"He page fb.com/hmangchang.blog hi lo like ve la.."

Emaw

"He group fb.com/groups/manfor hi lo join ve la.."

tiin midang kan hrilh zung zung thei dawn tihna a nih chu..

I lo hlawkpui ngei beisei chungin i duh tawk leh phawt mai ang.. ✌😇