SBI Quick - Missed Call Banking hmangchang

SBI Quick – MISSED CALL BANKING an tih mai hi SBI free service pakhat, SBI Account nei apiang tana hman theih tura duan a ni a. He service hmang hian mahni awmna hmun apiang aṭangin Account Balance, Mini Statement leh thil dang dang pawh - SMS emaw Missed Call emaw hmang ngawtin kan mobile aṭangin kan check zung zung thei a ni.

He thil hi tam tak tana ṭangkai tur si, ṭhenkhatin vawiin thlenga kan la hriatfuh chuan loh thil a nih avangin kan share ṭha ve leh reng reng ang e.

He service hmang thei tur chuan kan Bank Account ah kan number kan update a ngai a. Account kan hawn hnuah ka mobile number dah tel kha kan hmang zawm lo emaw hmang tawh lo a nih chuan bank ah kan mobile number hmanlai ngeiin kan va update tir a ngai a, Bank Account kan hawn laia Mobile Phone kan la neih loh vanga Mobile Number kan ziak tel lo a nih pawhin kan update tir hmasak a ngai.

Tin, Bank Account details a kan number dah hi chu kan himna atan hman zui reng hi a him ber tih hi i hre nawn awn awn teh ang u. Mi ṭhenkhat, SIM thlak kual nasat avanga an Bank Account nena link number tihluma buaipui leh ngai hi an awm zauh zauh a. Buaipui zui nachang kan lo hre lova, kan number thi ta kha new connection ah an lo pe chhuak leh a nih phei chuan kan bank security kha a chhe sawt ve thei tlat tih hriat tel a ṭha.

Android, Windows, iOS leh Blackberry device hmang tan store ah SBI Quick Application hi download mai tur a awm bawk a. Download a install hnu chuan Internet connection ngai kher lovin login hma khan SBI Quick service hi - app kaltlang khan call emaw SMS hmanga hman mai theih a ni a. He app hmangtu tan chuan call/SMS na tur number mai bakah SMS dan tur kha vawn reng a ngai ve lo.

Chutih rualin kan mobile storage neih dan a in an loh avangin application install kher lova hman dan zawk hi i han sawi chiang dawn teh ang.

I Bank Account ah i number i update tawh a nih chuan emaw, i Bank Account hawn laia i details a i number ziah kha i la hmang a nih chuan:

1. I bank account details a i dah number aṭang khan 9223488888 ah SMS in REG BankAccountNumber thawn khan he service hmang turin i in register thei ang.

Confirmation message a lo thleng ang a. Successful emaw Unsuccessful emaw a rawn inti ang a. A success chuan he service hi i hmang ṭan thei tihna a ni a, a success loh chuan:

• I thawnna number leh i message thawn kha guide ang a nih leh nih loh check ṭha leh ang che.
• Thawnna atana i hman kha Bank details a i number ziah zawk ngei kha a nih leh nih loh fiah leh ang che.

SBI Quick application hmang lova he service hmang tur chuan heng number leh a SMS dan chhinchhiah hi a ngai ang:

Registration: A hmaa sawi tawh ang khian REG Accountnumber tih hi +919223488888 ah thawn mai tur a ni.

De-Registration: I duh leh lo a nih pawhin DREG Accountnumber tih hi +919223488888 ah thawn leh mai tur a ni.

 Balance Inquiry: I balance i check duh a nih chuan +919223766666 ah call in emaw SMS a BAL tih thawnin i check thei bawk ang.

 Mini Statement: Mini Statement - i sum dahluh leh lakchhuah dan vel - i check duh a nih chuan +919223866666 ah i call in emaw, SMS a MSTMT tih i thawnin emaw i check thei bawk.

 ATM Card Blocking: I ATM Card i tibo emaw, an ru emaw, eng emaw vanga i block duh a nih chuan 567676 ah BLOCK XXXX tiin i SMS mai dawn nia. (XXXX aiah hian i ATM Card No tawp lam digit 4 kha dah tur)

 SBI Loan Features: Loan chungchanga hriat chian duh i nei a nih chuan +919223588888 ah emaw 567676 ah emaw, insakna tur puk dan i hriatchian duh chuan HOME tiin SMS la, motor leina tur puk dan i hriatchian duh thung chuan CAR tiin i SMS mai dawn nia.

A hmaa sawi tawh ang khan, he service hmang tur chuan bank account details a kan number dah ngei aṭanga call/SMS a ngai tih kha hria ila, tin in register phawt loh khi chuan a khawia mah khi hman theih a ni lo bawk. Hei hi i himna tur zawk a ni e..

I hlawkpui ngei beiseiin duhtawk leh phawt ang..

In ṭhian,

- Muankima

SBI Account leh Aadhaar Card link dan

SBI Account tinah Aadhaar Card link a ngai ta zel a. Hei hi kan tana security țhat zâwkna tur ni mahse bank lam thawktute hun tawt lutuk nen mipui lam tan buaina tham a ni ve reng thei a. Chuvangin bangbo zawkte tan a tih theih dan kawng hrang hrang an ziah chi li/nga te hi Mizo țawngin kan chhawp ve reng reng ang e. Mahse kei chuan Anywhere App hmanga ka link avangin option dang hi pakhat mah ka test lem lova, internet lam ami Mizo țawngin ka chhawp ve mai a ni tih erawh min hriatsak dawn nia..

SMS HMANGIN:
Account zawng zawng deuh thawah hian Mobile number kan register tel miau avangin hei hi mi zawng zawng tana applicable ber a ni hial ang a. A tihdan tur chu:
1. 567676 ah UID (space) Aadhaar number (space) Account number i thawn ang. (Eg: UID YYY ZZZ, where YYY = Aadhaar No., ZZZ = Bank Account No.)
2. I SMS thawnna mobile number kha la register loh a ni emaw, i SBI Account ah Aadhaar link tawh emaw a nih chuan SMS in an rawn hrilh ang che.
3. I mobile number chu i account ah i register tel a nih chuan SMS in Aadhaar leh i account link i dil thu an rawn hrilh ang che.

ATM HMANGIN:
SMS hmanga kan link fu hlei thei lo palh hlauh a nih pawhin ATM ah awlsam taka link theih a la ni cheu! Tunlai SBI Account chuan ATM Facility hi a ken nghal deuh zel tawh avangin hei pawh mi zawng zawng deuhthawin an tih theih tur thil bawk a ni a. A hnuai ami ang hian lo try ve mah teh:
1. ATM ah kal la, i ATM Card kha swipe in i PIN Code barh rawh.
2. Option lo langah khan 'Service - Registrations' Menu kha thlang rawh.
3. 'Aadhaar Registration' option kha i thlang leh ang.
4. I Account type (Savings/Checking) thlan a lo ngai ang a, i thlan zawhah Aadhaar number enter na tur lo awmah khan enter rawh
5. I proceed hunah Aadhaar Number enter nawnna tur a lo lang ang a, enter nawn lehin proceed leh la i zo der.

ONLINE BANKING HMANGIN:
Mi țhenkhat chuan Internet Banking Facility an nei a, chung mite tan pawh chuan Bank a kal lova link theih tho a ni. Chutih rualin online banking service hi miin an hmanna a in ang lem lova, a țhen chuan web browser ațangin an hmang a, a țhen chuan an mobile ah SBI Anywhere (SBI Official) app hmangin an khawih țhin thung. Chuvangin A leh B ah țhenin i sawifiah dawn chhin teh ang.

A. Browser hmangin:
1. SBI Online Site ah log in la
2. I screen veilama 'My Accounts' hnuaia 'Link your Aadhaar number' kha click rawh.
3. Tichuan i Account number thlanna turah khan thlang la, Aadhaar number chhutna tur lo langah khan i Aadhaar number i chhu lut dawn nia.
4. Submit button kha click la i zo der

B. SBI Anywhere hmangin:
1. SBI Anywhere app kha hawngin login la
2. Request tab kha hawng la
3. Aadhaar option kha thlang la
4. Aadhaar Seeding ah khan lut rawh
5. I Account select la
6. I 12 digit Aadhaar Number kha a hnuai pahnih ah khan fill-up la
7. I fill-up zawhah Confirm click la
8. Sual a awm loh chuan Confirm click nawn leh rawh
9. Tichuan i registered number ah khan SMS a lo thleng ang a, tah khan OTP an lo thawn ang che. (I mobile OS a zirin OTP hi copy a ngai mai thei a, OS sang hovah chuan SMS lo thlen rualin auto in a rawn in fill-up ang)
10. Fill-up chawp a ngaih chuan i SMS lo thlenga OTP kha copy in Anywhere app a paste na tur lai ah khan paste ang che. (Mobile tam zawk ah chuan SMS kha hawn kher ngai lovin notification bar ah khan OTP a lang nghal ang a, khami en khan i type lut thei bawk.)
11. Ok/Confirm i click leh ang a, i zo der.

SBI BRANCH A KALIN:
Heng zawng zawng hi i thei ve lo fai vek a nih chuan SBI Branch ah nangmah ngei i kal a ngai dawn a, a kalhmang i bo lohna atan hei aw kaihhruaina tlem:
1. Aadhaar Xerox nen SBI Branch ah kal la
2. Aadhaar link dilna lehkha lachhuakin i fill-up ang a, Aadhaar Xerox nen thehluhna tur an hrilh ah che khan i submit leh ang.
3. Tikhan i zo der a, a dik leh dik loh SMS a an hrilh hun che lo nghak turin i haw san thei..

Mahse, Aadhaar fel tawk lo emaw, eng emaw thilah Bank emaw UIDAI lamin an verify lo palh thei a, a eng method ber pawh khi hmang la, i Aadhaar number chu Bank leh UIDAI lamin an verified hun hunah a in link nghal tawh ang.

An verify thei lo a nih chuan SMS in an rawn hrilh leh che ang a, i Aadhaar Number emaw e-aadhaar emaw nena SBI Branch pan mai turin an rawn hrilh ang che. Chuti a nih chuan a dik lo lai tidik tura i buaipui kual ve deuh erawh a ngai dawn tih hre tel ta la..

PAN CARD NENA LINK DAN I HRIAT DUH CHUAN 💁 Hei hi click rawh!

I lo hlawkpui ngei beiseiin i duhtawk phawt ang.. Hetiang ang hmangchang dang i lo hriatbelh zel duh chuan 💁 Muankima Khawlhring Facebook Page hi lo SUBSCRIBE ve ngei ang che..